भारतीयांचा ’कोटा’ वाढला, दारूचा उच्चांकी खप





मुंबई: भारतीय थोडीशी नव्हे भरपूर दारू पित असल्याने देशातील दारू विक्रीने सहा वर्षातला उच्चांक गाठला आहे. 2012 नंतर प्रथमच दारू विक्रीत सर्वाधिक तेजी दिसून आली आहे. 2018पूर्वी सलग दोन वर्ष दारू विक्री घटली होती. राष्ट्रीय महामार्गांलगत असलेल्या दुकानांमधून दारू विक्रीवरील निर्बंध शिथिल झाल्याने आणि काही राज्यातील वितरण रचना बदलल्याने दारू विक्री मोठ्या प्रमाणात वाढली आहे. यामुळे दोन वर्षानंतर मद्य उत्पादन करणार्‍या कंपन्या फायद्यात आल्या आहेत. उत्पादन शुल्क विभागाने ही माहिती दिलीय.

व्हिस्की, ब्रँडी, रम आणि व्होडकासह इतर मद्यांची मागणी वाढली आहे. खासकरून भारतात तयार होत असलेल्या परदेशी दारूच्या विक्रीत मोठी वाढ झाली आहे. गेल्या वर्षी ही विक्री 10 टक्क्यांनी वाढून 35.90 कोटी केस विकले गेले. एका केसमध्ये एक लीटर दारूच्या 12 बाटल्या असतात. मद्य उत्पादन कंपन्यांसाठी 2017 हे वर्ष सर्वात वाईट ठरले. त्यावर्षी दारू विक्रीत 3 टक्के घट झाल्याने 32.8 कोटी केस खपले. 2001 ते 10 पर्यंत देशात दारू विक्री सरासरी 12 टक्क्यांहून अधिक वाढली होती. रॉयल स्टॅग, मॅक्डॉवल आणि ऑफिसर्स चॉइस या रारख्या परदेशी पण भारतात उत्पादीत होणार्‍या दारूचा विक्रीतील वाटा 70 टक्के इतका आहे.

मद्य उत्पादन उद्योगात तेजी आली आहे. पण काही नियमांमुळे आणि उत्पन्नावरील दबावामुळे नफा थोडा कमी झाला आहे, अशी माहिती मद्य उत्पादन करणारी देशातली सर्वात मोठी कंपनी युनायटेड स्पिरिट्सचे प्रमुख आनंद कृपालु यांनी दिली.

2017मध्ये सुप्रीम कोर्टाने राष्ट्रीय आणि राज्य महामार्गांलगत दारू विक्रीवर कडक निर्बंध घातले होते. यामुळे देशातील सुमारे 30 हजार दुकानं बंद पडली होती. यामुळे बिअर आणि दारूची मागणी घटली. पण सुप्रीम कोर्टाने नियम शिथिल केल्याने दारू विक्रीची अनेक दुकानं पुन्हा सुरू झाली.

No comments

Powered by Blogger.