अण्णाभाऊ साठेंना ’भारतरत्न’ द्या; शिवसेना


नवी दिल्ली: भाजपच्या नेतृत्वाखालील एनडीएमधून शिवसेनाबाहेर पडल्यानंतर दोन्ही पक्षांमध्ये रोजच शाब्दिक चकमकी झडत आहेत. त्याचे चित्रं हिवाळी अधिवेशनातही पाह्यला मिळत आहे. भाजपने स्वातंत्र्यवीर सावरकरांना भारतरत्न पुरस्कार देण्याची मागणी केलेली असतानाच शिवसेनेने लोकशाहीर अण्णाभाऊ साठे यांना भारतरत्न पुरस्कार देण्याची मागणी लोकसभेत केली आहे. शिवसेनेने याआधीच सावरकरांना भारतरत्न पुरस्कार मिळावा म्हणून वेळोवेळी मागणी केलेली असतानाच शिवसेनेच्या या नव्या मागणीवर आश्चर्य व्यक्त केलं जात आहे.

भाजपचे मुंबईतील खासदार गोपाळ शेट्टी यांनी आज लोकसभेत सावरकरांना भारतरत्न देण्याची मागणी केली होती. त्यापाठोपाठ शिवसेनेचे मुंबईतील खासदार राहुल शेवाळे यांनी अण्णाभाऊ साठे यांना भारतरत्न पुरस्कार देण्याची मागणी आज लोकसभेत लावून धरली. आपल्या विपुल साहित्यातून दलितांच्या उत्थानासाठी आयुष्यभर प्रयत्न करणारे थोर साहित्यिक लोकशाहीर अण्णाभाऊ साठे यांना, भारत सरकारचा सर्वोच्च ’भारतरत्न’ पुरस्कार प्रदान करावा, अशी मागणी खासदार राहुल शेवाळे यांनी लोकसभेत केली. लोकशाहिरांच्या कार्याचा यथोचित गौरव करण्याच्या मागणीसाठी काही महिन्यांपूर्वी खासदार शेवाळे यांनी थेट पंतप्रधान नरेंद्र मोदी यांना पत्र पाठविले होते. मंगळवारी खासदार शेवाळे यांनी या मागणीचा पुनरुच्चार लोकसभेत केला.

दक्षिण-मध्य मुंबईचे खासदार राहुल शेवाळे यांनी मंगळवारी लोकसभेच्या शून्य प्रहरात बोलताना लोकशाहीर अण्णाभाऊ साठे यांचे साहित्यिक आणि सामाजिक योगदान अधोरेखित केले. खासदार शेवाळे म्हणाले की, दिवंगत लोकशाहीर तुकाराम भाऊराव साठे (1920-1969) यांना देशभरातील जनता अण्णाभाऊ साठे या नावाने ओळखते. एका साधारण मातंग कुटुंबात जन्माला आलेल्या अण्णाभाऊंनी त्यांच्या लेखणीतून दलित आणि कष्टकर्‍यांच्या वेदनांना वाचा फोडली. सुमारे 35 कादंबर्‍या, 15 कथासंग्रह, नाटक आणि पोवाडे अशी विपुल ग्रंथसंपदा अण्णाभाऊंनी निर्माण केली. जगभरातील 27 भाषांमध्ये त्यांच्या साहित्याची भाषांतरे करण्यात आली. भारतरत्न डॉ. बाबासाहेब आंबेडकर यांचे खरे अनुयायी असणार्‍या अण्णाभाऊंनी आपल्या साहित्यातून दलितांच्या उत्थानासाठी प्रयत्न केले. त्यांच्या समाजकार्याचा गौरव करण्यासाठी ऑगस्ट 2002 साली भारतीय टपाल विभागाने, विशेष टपाल तिकीट प्रकाशित केले होते. या थोर समाजसेवकाला ’भारतरत्न’ पुरस्काराने सन्मानित करण्याची मागणी गेल्या देशभरातून मोठ्या प्रमाणात केली जात आहे, असे शेवाळे यांनी आज लोकसभेत स्पष्ट केलं. दरम्यान, भाजपच्या नेतृत्वाखालील एनडीएतून बाहेर पडल्यानंतर शिवसेनेने नागरिकता दुरुस्ती विधेयकाला विरोध आहे. तसेच अयोध्याप्रकरणाचं कुणी श्रेय घेऊ नये, असा टोलाही शिवसेनेने भाजपला लगावला होता.

No comments

Powered by Blogger.